ВАТАННИ ЎЗБЕКЧА СЕВ, БОЛАМ!

Қизалоқларнинг хоҳишини қайтаргиси келмай дадаси қўлидаги телефонга уларни ҳар хил усулда суратга туширди. Қайтиб, машинага ўтиришгач опа-сингиллар бир-бирига бармоқлари орқали “♥” шаклини кўрсатиб, “Ай лав” деб қайта-қайта такрорлаб айтаверишди. 

Уларнинг бу “қилиғи”дан бироз сергакландим. Мактабнинг 4-синфида ўқиётган қизим инглиз ва рус тилидаги сўзлашувни ўзлаштириш даражаси яхши бўлгани учун йўлдаги анча-мунча ёзувларни ўқиб таржима қилишга ҳам улгуради.

Мендан аввал шу қизим гап бошлади. “Аяжон, нимага ҳамма жойда инглизча ёзувда шунақа нарса ўрнатилган. Бундай ёзувларни йўлда кўп марта кўрганман. Бу инглизча ёзув-ку”. Биз Ўзбекистонда яшасак, кейин мана бу шаклни (“♥” шаклини назарда тутиб бармоқлари билан кўрсатяпти) ўрнига ҳарфлар билан ёзишса, айниқса,лотинча сўзни ўрнига “Men Jizzaxni sevaman” деб ёзилса, яхши бўлмайдими?

Бу саволга жавоб сифатида қизимга тушинтиргандай бўлдим: “Қизим, юртимизга жуда кўп хорижлик меҳмонлар келади. Инглиз тили – дунёда энг ривожланган тиллардан бири. Бу ёзувлар ўша вилоят, шаҳарнинг ёки туманнинг номини билдириш билан бирга ўша жойга бўлган меҳр-муҳаббат белгиси...”.

Қизимнинг навбатдаги саволидан ҳайратланиб, жавоб топа олмай қолдим:

– Ватанга бўлган меҳрни ўз юртимизда инглизча эмас, ўзбекча айтсак хорижлик меҳмонлар биздан хафа бўладими?...

Орадан кунлар ўтса ҳамки қизимнинг ўша куни берган саволи миямда чарх уриб айланаверади. Юртимиз бўйлаб диққатга сазовор жойларда мана шундай ёзувларга кўп бор дуч келганмиз. Бу орқали юртимизга келган сайёҳларни ром эттира оламизми? Аксинча ўз она тилимизга бўлган муносабатни кўрсатиб қўймаяпмизмикан? “Юрак” шаклининг қўлланилишидан мақсад не? Унинг ўрнига миллийлигимизни акс эттирадиган кўринишлар билан безатсак чет эллик сайёҳларнинг эсида қолмайдими? Аслида ватанпарварлик ўз она тилига бўлган ҳурматда намоён бўлмайдими?

Бу унчалик катта муаммо эмасдир, аммо келажак авлодни Ватанга бўлган муҳаббат, ўз она тилимизга ҳурмат руҳида тарбиялашда мана шундай унсурларнинг ҳам ўрни алоҳида эканини унутмайлик.

Дилфуза МАҲКАМОВА.