ЯНГИ БИНОЛАР ФОЙДАЛАНИШГА ТОПШИРИЛДИ

Рамазон ҳайити арафасида Жиззах вилоятининг бир қатор ҳудудларида янги объектлар қурилиб, ишга туширилмоқда.

Жумладан, олис тоғли Янгиобод тумани Баландчақир маҳалласида 2-сонли давлат мактабгача таълим ташкилоти учун 120 ўринли замонавий бино қурилди.

Боғча замонавий талабларга тўлиқ жавоб берадиган даражада жиҳозланган бўлиб, болажонлар учун барча қулайлик яратилган.  

ДМТТда машғулот хоналари, шинам ётоқхона, кенг ошхона, шунингдек, болаларнинг жисмоний ва интеллектуал ривожланишига кўмак берувчи спорт ҳамда ўйин майдончалари мавжудлиги эътирофга лойиқ.

Ушбу мактабгача таълим ташкилоти қурилиш ва жиҳозланиши учун  давлат бюджети ҳисобидан 3 миллиард 900 миллион сўм маблағ сарф-харажат қилинди. 

***

Зарбдор туманидаги “Мустақиллик” маҳалла фуқаролар йиғини замонавий ва қулай янги бинога кўчиб ўтди.  

Ушбу янги маскан нафақат маҳалла фуқароларига хизмат кўрсатади, балки мулоқот ва бирдамлик марказига айланади. Бу ерда маҳалла ҳаётига доир турли учрашувлар, маслаҳатлар ва ижтимоий тадбирлар ўтказилади.

Мустақиллик маҳалласининг ушбу янги биноси маҳалла институтини ривожлантириш борасидаги тизимли ишларнинг амалий ифодасидир.

***

Жиззах шаҳридаги “Сайхон” маҳалла фуқаролар йиғини учун қурилган янги бино фойдаланишга топширилди.  

Очилиш маросимида маҳалла фаоллари ва ҳудуд аҳолиси иштирок этиб, янги бинонинг рамзий калити тантанали равишда топширилди.  

Маҳалла фуқаролар йиғини учун махсус қурилган ушбу бино фуқароларга хизмат кўрсатиш сифати ва самарадорлигини оширишга хизмат қилади. Янги бинода маҳалла аҳолиси учун турли тадбирлар, учрашувлар ва маслаҳатлар ташкил этилиши ҳам режалаштирилган.  

Ҳудуд аҳолиси янги бинога эга бўлиш орқали маҳалла фаолиятини янада ривожлантириш, фуқароларга қулайлик яратиш ва ижтимоий фаолликни ошириш имконига эга бўлди.

А.Қаюмов, Ж.Ёрбеков (сурат)