Жиззах шаҳрида 297 минг туп кўчат экилди

Шаҳарнинг барча маҳалла фуқаролар йиғинлари, ташкилот, идора ва муассасаларида ҳашар уюшқоқлик билан ташкил этилди.  

Жумладан, Жиззах шаҳридаги Сангзор дарёси қирғоғи бўйлаб уюштирилган ҳашарда шаҳар ободонлаштириш бошқармаси раҳбар, мутахассис ва ишчи-хизматчилари фаол иштирок этди. Ободонлаштириш тизими вакиллари томонидан ҳудуд турли маиший ва қаттиқ чиқиндилардан тозаланиб, атроф-муҳитга зарар етказадиган омиллар бартараф этилди. Ушбу ҳашар доирасида ободонлаштирилган ҳудудларга 2500 туп мевали ва манзарали дарахт кўчати экилди.  

Ифторликда ҳашар иштирокчилари учун миллий баҳорий неъматлар билан безатилган байрам дастурхони ёзилиб, барча ҳашарчилар учун дошқозонда тўйоши  тортилди.  

– Баҳорги кўчат экиш мавсумида Жиззах шаҳри ҳудудига 351 минг туп мевали ва манзарали дарахт кўчатлари экиш режалаштирилган, – дейди Жиззах шаҳар экология, атроф муҳит муҳофазаси ва иқлим ўзгариши  бўлими инспектори Насриддин Ишкабулов. –24 мартга қадар жиззахликлар шаҳар ҳудудига 297 минг туп кўчат экиб, бу борадаги режани 85 фоизга уддалашди. Ҳар туп экилган кўчат учун масъул бириктирилган.

Рамазон ҳайити арафасидаги ҳашарда Жиззах шаҳар мактабгача ва мактаб таълими бўлими ходимлари ва бўлимга қарашли умумтаълим мактаблари ўқитувчилари, юқори синф ўқувчилари ва уларнинг ота-оналари ҳам ихтиёрий равишда фаол иштирок этганларини алоҳида таъкидлаб ўтиш лозим.

Жиззах вилоят ҳокими вазифасини бажарувчи Улуғбек Мустафоев ҳар бир мактабда ота-оналар боғини барпо этиш ташаббусини кўтарган эди. Ана шу эзгу ташаббусни бир овоздан қўллаб-қувватлаган Жиззах шаҳар мактабгача ва мактаб таълими бўлимига қарашли барча умумтаълим мактаблари ўқитувчилари, ўқувчилари ва уларнинг ота-оналари атроф-муҳитни кўкаламзорлаштириш ва баҳорги кўчат экиш ишларида фаол иштирок этаётир.

Жумладан, шаҳардаги 22-сонли умумтаълим мактабида уюштирилган ҳашарда мактаб ҳовлиси ва боғига ўқитувчи-ўқувчи ва уларнинг ота-оналари томонидан 150 туп арча кўчати экилди.  

А.Қаюмов, Ж.Ёрбеков (сурат),