JIZZAX SHAHAR HOKIMI KOMIL XOLMURODOVNING NAVRO'Z UMUMXALQ BAYRAMI MUNOSABATI BILAN TABRIGI

Qadrli hamyurtlar!

Siz azizlarni va butun xalqimizni yangilanish, mehr-oqibat va hamjihatlik ramzi bo`lgan  sharqona yangi yilni boshlab beradigan kun - Navro`zi olam bayrami bilan chin qalbimdan muborakbod etaman!

Aytish joizki, yurtimizda ezgulik, mehr-oqibat, qut-baraka timsoli bo’lmish bahor faslining sururi va shukuhi kezib yuribdi. Zero, Navro’z ayyomida ona zamin va tabiatni e`zozlashdek ezgu tamoyillar mujassam. 

Ana shu jihatlar Birlashgan Millatlar Tashkiloti tomonidan e`tirof etilib, munavvar ayyomga xalqaro bayram maqomi berilganligi barchamizga cheksiz g`urur hissini baxsh etadi. 

Navro`z - qadimiy va ezgu qadriyatlarimiz ifodasi bo`lib, xalqimizning saxovati va mehmondo`stligini yana bir bor namoyon etadigan ulug` ayyomdir. Bu kunda tabiat uyg`onadi, dillar ezgulik va yaxshilikka to`ladi.

Eng ulug` ayyomimizning xayr-u saxovat va mehr-oqibat oyi bo`lgan Ramazoni sharif bilan uyg`unlashuvi ham o’ziga xoslik kasb etdi. Muqaddas islom dinining odamiylik mohiyati har bir oilada, mehnat jamoasida hamjihatlikni mustahkamlaydi. Osoyishtalik, ravnaq va farovonlik bor zamindan baraka arimaydi.

Aziz yurtdoshlar!

Navro`z barchamizga fayz va baraka, xonadonlarimizga tinchlik va farovonlik olib kelsin! Har bir oilada quvonch va baxt, dasturxonlarda to`kinlik abadiy bo`lsin!

Bayramingiz muborak bo`lsin!