ЕР ОСТИ ЙЎЛАГИНИНГ УСТКИ ҚИСМИ БИТДИ

Сўнгги йилларда мамлакатимизда, шу жумладан, вилоятимизда ҳам йўлсозлик соҳасини ривожлантириш, йўлларни халқаро талаблар даражасига келтиришга алоҳида эътибор қаратилаётир.

Маълумки, Жиззах шаҳрида транспорт ҳаракати тирбандлигини камайтириш, ҳаракат хавфсизлигини таъминлаш мақсадида бир неча жойда ер ости йўлаклари қурилиб, фойдаланишга топширилган эди.

Ўзбекистон Республикаси Президентининг 2024-йил 8-9 апрел кунлари Жиззах вилоятига ташрифи давомида берилган топшириғи ҳамда Ўзбекистон Республикаси Вазирлар Маҳкамаси раёсати мажлисининг 2024-йил 7 августдаги №86-сонли баёнига асосан вилоятимизда яна учта ер ости йўли қурилиши белгиланганди. 

Ер ости ўтиш йўллари Жиззах шаҳар марказий деҳқон бозори ва унинг атрофидаги Навоий, Ҳамид Олимжон маҳалласининг Ўзбекистон кўчалари кесишмасида, “Ёшлар шаҳарчаси”дан “Наврўз” истироҳат боғига ўтувчи Ислом Каримов шоҳ кўчасида барпо этилмоқда.

Шу кунларда Марказий деҳқон бозори олдида туташган чорраҳадаги асосий йўлнинг ҳаракатланувчи қисмида қурувчилар томонидан асфалт қопламасини ётқизиш ишлари олиб борилмоқда. Мақсад Наврўз умумхалқ байрамига қадар ер ости ўтиш йўлининг устки қисмини тезроқ фойдаланишга топшириш ва чекланган транспорт ҳаракатини яна йўлга қўйишдан иборат.

Шунингдек, ер ости ўтиш йўлига тушиш ва чиқиш йўлакчаларнинг зинопоялари қуйилиб, бетон ва электр монтаж ишлари ҳам олиб борилмоқда.

“Жиззах овози” газетаси.