SPORTDA QIZLAR BELLASHDI

Jizzax shahrida Oliy Majlis huzuridagi Jamoat fondining moliyaviy ko`magi asosida “VATAN” sport klubi tashabbusi bilan xotin-qizlar o`rtasida sport musobaqalari tashkil etildi.

“Sport – sog`lom hayot garovi” grand loyihasi doirasida o`tkazilgan musobaqalarda xotin-qizlar parashashka, badminton va boks yo`nalishlari bo`yicha bellashdilar.

2011-2013-yillarda tug`ilgan qizlar orasidan Xumora Rustamova va katta yoshdagi ishtirokchilardan Ozoda Bo`tayeva parashashka musobaqasida 1-o`rinni egallashdi.

Sharof Rashidov tumanida badminton bo`yicha o`tkazilgan musobaqada turli yosh toifalaridagi qizlar g`oliblik uchun kurash olib bordi. 2009-2011-yillarda tug`ilgan qizlar o`rtasida Dilshoda Mo`minjonova, 2006-2008-yillar toifasida esa Nigina Mo`minova chempionlikni qo`lga kiritdi.

Boks bo`yicha viloyat birinchiligi Jizzax shahri, Do`stlik, Gallaorol, Zomin va Sharof Rashidov tumanlaridan kelgan jamoalar ishtirokida bo`lib o`tdi. 

Barcha g`oliblar “VATAN” sport klubi tomonidan diplom, medal va esdalik sovg`alari bilan taqdirlandi.

Z.SULTONMURODOVA,

"VATAN" sport klubi rahbari.