JIZZАX VOHАSINING NURLI UFQLАRI

jizzax ovozi 2, [10.04.2024 11:05]

JIZZАX VOHАSINING NURLI UFQLАRI

    O‘zbekiston Respublikasi Prezidenti Shavkat Mirziyoev 8-aprel kuni Jizzax viloyatiga tashrif buyurdi.

   Tashrif Forish tumanidagi “Basalt Uzbekistan” klasteridan boshlandi. Davlatimiz rahbari 2019-yil yanvar oyida bu korxonada bo‘lib, uning faoliyatni yanada kengaytirish, mahsulotlar turini ko‘paytirish bo‘yicha ko‘rsatmalar bergan edi. Shu asosida bozordagi talab, xomashyo olinadigan konlar o‘rganildi. Natijada umumiy qiymati 498 million dollarlik oltita loyiha tashkil etilib, korxona klasterga aylandi. Bu galgi tashrif chog‘ida mutasaddilarga shu yerning o‘ziga 500 million dollarlik 20 turdagi yangi loyihalarni joylashtirish vazifasi qo‘yildi.

   Prezident shundan so‘ng Sharof Rashidov tumanida 140 gektarli ulkan maydonda jadal qurilish ketayotgan “Yangi O‘zbekiston” massivini borib ko‘rdi.

   Shavkat Mirziyoev Sharof Rashidov tumanidagi “Tuyoqli” mahallasida bo‘lib, aholining turmush sharoiti va daromadlari bilan qiziqdi.

   Tashrif davomida Prezidentimiz 2021-yilda tashkil etilgan “Kia”, “Chery” hamda “Haval” brendlari ostida 23 turdagi yengil mashinalar ishlab chiqarayotgan “ADM Jizzakh” avtomobil zavodi faoliyati bilan tanishdi. Shuningdek, davlatimiz rahbari sanoat va energetika loyihalarining boshlanishiga bag‘ishlangan marosimda ishtirok etdi va ramziy tugmani bosib, G‘allaorol tumanida barpo etiladigan, metallurgiyaga ixtisoslashgan sanoat zonasi hamda Forish tumanida Xitoyning “China Poly Group” va “China Electric” kompaniyalari bilan hamkorlikda barpo etiladigan quyosh elektr stantsiyasi qurilishini boshlab berdi.

   Shu kuni davlat rahbari yiliga 10 ming tonna qishloq xo‘jaligi mahsulotlarini saqlash hamda 8 ming tonnasini birlamchi qayta ishlash imkoni mavjud bo‘lgan “BMB Holding” kompaniyasining agrologistika majmuasini borib ko‘rdi.

   9-aprel kuni Prezident Shavkat Mirziyoev raisligida Jizzax viloyatini ijtimoiy-iqtisodiy rivojlantirish masalalari yuzasidan yig‘ilish bo‘lib o‘tdi. Yig‘ilishda sohalarda yo‘l qo‘yilgan kamchiliklar keskin tanqid qilindi. Jumladan, yig‘ilishda viloyatda iqtisodiyotni yangi bosqichga ko‘tarish, tadbirkorlikni rivojlantirish va aholi daromadlarini oshirish uchun mavjud salohiyat to‘liq ishga solinmayotganligi, viloyat va tumanlar rahbariyatining bu boradagi faoliyati juda sustligi ko‘rsatib o‘tildi.

   Prezident mahallalarda tomorqalarni ishga solish, byudjet hisobidan agronom jalb qilish, o‘qitish, mahsulotlarni yig‘ish, saqlash va quritish punktlarini tashkil qilish uchun 1 milliard so‘mgacha grantlar berish, xonadonlarga Oilaviy tadbirkorlik va “Biznesga birinchi qadam” dasturidan kredit ajratish masalalari bo‘yicha ko‘rsatmalar berdi.

   Yig‘ilishda iqtisodiyot tarmoqlarida o‘zimizda ishlab chiqarilgan qurilish materiallaridan foydalanishni kengaytirish muhim ekani qayd etildi. Qurilish, irrigatsiya va kommunal xo‘jaligidagi qurilish normalarida bazalt mahsulotidan foydalanishni ko‘paytirish lozimligi ta’kidlandi.

   Prezident Shavkat Mirziyoev uy-joy va mahalla infratuzilmasini yaxshilash – doimo diqqat markazida bo‘lishini alohida qayd etdi.

   10 ta madaniy meros obektida “Turizm halqasi” yaratilishi, ularga turizm mahallasi maqomi berilishi belgilandi. “Turizm halqasi” obektlariga boradigan yo‘llarni ta’mirlash topshirildi.

   Yig‘ilishda shuningdek, mahallalar infratuzilmasini yaxshilash, joylarda bog‘cha va maktablar qurish, Jizzax shahridagi tibbiyot muassasalari va ko‘priklarni ta’mirlash chora-tadbirlari yuzasidan mutasaddilarga aniq topshiriqlar berildi.

   Tashrif doirasida davlatimiz rahbari Zarbdor tumanidagi “Lalmikor” mahallasida ham bo‘lib, bu yerda rezavor mevalar yetishtirish bo‘yicha tashkil etilgan o‘quv maydoni, tomorqachilikni rivojlantirish borasidagi fikrlarini bayon etdi. Shundan so‘ng Prezident Zomin tumanidagi “Jizzax Organis” chorvachilik klasteri faoliyati bilan tanishdi.

   O‘zbekiston Respublikasi Prezidenti Shavkat Mirziyoevning Jizzax viloyatiga qilgan tashrifi shu tariqa yakuniga yetdi.

(UzA materiallari asosida tayyorlandi)